- ശരീരവും മനസ്സും ആരോഗ്യത്തോടെ നിലനിര്‍ത്തുന്നതില്‍ ആഹാരത്തിന് പ്രധാന പങ്കാണുള്ളത്. ഋതുഭേദങ്ങള്‍ക്കനുസരിച്ചു കഴിക്കേണ്ട ഭക്ഷണങ്ങള്‍ക്കും വ്യത്യാസമുണ്ട്. ആഹാരംതന്നെ ഔഷധമാക്കി മഴക്കാലത്ത് ദേഹരക്ഷയ്ക്കായി പ്രയോജനപ്പെടുത്താം. വര്‍ഷകാലത്ത് ദഹനശക്തി വര്‍ധിപ്പിച്ച് അതിലൂടെ രോഗപ്രതിരോധം നേടാനാവുന്ന രീതിയിലുള്ള ലഘുവായ ഭക്ഷണങ്ങളാണ് ഉചിതം. ഇടവേളകളില്‍ വെണ്ണനീക്കിയ മോര്, പച്ചക്കറി സൂപ്പുകള്‍, പഴച്ചാറുകള്‍ ഇവ കഴിക്കാം. ചുക്കും മല്ലിയും ജീരകവും ചേര്‍ത്ത് വെന്ത വെള്ളം ദഹനത്തെ എളുപ്പമാക്കും. ഗോതമ്പ്, ചെറുപയര്‍, ചെന്നെല്ല്, നെല്ലിക്ക, പാവയ്ക്ക, കോവയ്ക്ക, വാഴക്കൂമ്പ്, മുരിങ്ങക്ക, കോഴിയിറച്ചി, ആട്ടിറച്ചി ഇവ മഴക്കാലത്ത് ഭക്ഷണത്തില്‍ ഉള്‍പ്പെടുത്താം.
ശരീരത്തിന്റെ പ്രതിരോധശേഷി നിലനിര്‍ത്താനും ദഹനം തടസ്സപ്പെടാതിരിക്കാനും വിരുദ്ധാഹാരങ്ങള്‍ കര്‍ശനമായും ഒഴിവാക്കുക. മത്സ്യത്തോടൊപ്പം ഉഴുന്ന്, പാല്‍, തേന്‍, മുളപ്പിച്ച ധാന്യങ്ങള്‍ ഇവ കഴിക്കരുത്. പാലും പുളിരസമുള്ള ഭക്ഷണവും ചേര്‍ത്ത് ഉപയോഗിക്കരുത്. തേനും നെയ്യും സമം ചേര്‍ത്ത് കഴിക്കരുത്. തൈരിനോടൊപ്പം കോഴിയിറച്ചി കഴിക്കുന്നതും ഒഴിവാക്കുക. തണുത്തതും എണ്ണകൂടിയതുമായ വിഭവങ്ങള്‍ മഴക്കാലത്ത് ഒഴിവാക്കുന്നതാണ് ഉചിതം.
മഴക്കാലത്ത് നിത്യവും കഴിക്കാവുന്ന ചില ഔഷധങ്ങള്‍: എ) പ്രതിരോധശക്തി വര്‍ധിപ്പിക്കാന്‍ തേങ്ങാപ്പാലില്‍ ഉണക്കലരി, ജീരകം, ആശാളി ഇവ ചേര്‍ത്ത് വെന്ത് കഴിക്കുക. ബി) തവിടുകളയാത്ത അരിയും ചെറുപയര്‍, വന്‍പയര്‍, മുതിര, ഉഴുന്ന്, മല്ലി, ജീരകം, ഏലയ്ക്ക, അയമോദകം, കുരുമുളക്, പെരുംജീരകം ഇവ ചതച്ചിട്ട് വെന്ത് കഴിക്കുക. പ്രമേഹരോഗിക്ക് പ്രതിരോധത്തിന്: നുറുക്കു ഗോതമ്പ്, ഉലുവ, പെരുംജീരകം, ഇഞ്ചി, മഞ്ഞള്‍, വെളുത്തുള്ളി ഇവ ചതച്ചിട്ട് കഞ്ഞിയാക്കി നെയ്യും കായവും ചേര്‍ത്ത് കഴിക്കുക.
മഴക്കാലത്ത് കരുത്തേകാന്‍ സൂപ്പുകള്‍: ശരീരം ക്ഷീണിച്ചുവരുന്നവര്‍ക്ക് മാംസസൂപ്പാണ് ഉചിതം. 250 ഗ്രാം ആട്ടിന്‍മാംസം ഒരുലിറ്റര്‍ വെള്ളത്തില്‍ തിളപ്പിക്കുക. 15 ഗ്രാം പഞ്ചകോലചൂര്‍ണംകൂടി ചേര്‍ക്കുക. 100 മില്ലി മാതളനാരങ്ങാനീര് ചേര്‍ത്തശേഷം അരിച്ച് ഇന്തുപ്പ്, കായം, ജീരകം ഇവ നെയ്യില്‍ വറുത്തു പൊടിച്ച് ചേര്‍ക്കുക. അസ്ഥിക്ഷയം, വേദന ഇവ ഇല്ലാതാകും. ചെറുപയര്‍ കഷായംവച്ച് അരിച്ചെടുത്ത് ഇന്തുപ്പ്, മല്ലി, ചുക്ക് ഇവ പൊടിച്ചുചേര്‍ത്ത് മാതളനാരങ്ങനീരു ചേര്‍ത്ത് ചുവന്നുള്ളിയും കറിവേപ്പിലയും നെയ്യില്‍ താളിച്ച് ഉപയോഗിക്കുന്നത് ശരീരബലം കൂട്ടാന്‍ ഏറെ ഉത്തമമാണ്. കുട്ടികള്‍ക്കും ഗുണപ്രദം. വയറിനെ ശുദ്ധമാക്കും മുക്കുടി ചുക്ക്, ജീരകം, അയമോദകം, കുരുമുളക്, പുളിയാരില, കുടകപ്പാലയരി, കൊത്തമല്ലി ഇവ അരച്ച് ഒരു ഗ്ലാസ് മോരില്‍ കലക്കി തിളപ്പിച്ച് പതയുമ്പോള്‍ മഞ്ഞള്‍പ്പൊടിയും ഉപ്പും ചേര്‍ത്ത് രാവിലെ കഴിക്കുക. ദഹനരസങ്ങളെ ഉദ്ദീപിപ്പിക്കാനും വയര്‍ ശുദ്ധമാക്കാനും ഉത്തമമാണ് മുക്കുടി.
Saturday, 10 January 2015
ആഹാരം തന്നെ ഔഷധം
Subscribe to:
Post Comments (Atom)
No comments:
Post a Comment